Phili 1 | BEF | STEP | Nani Poluita to Timoti hiti moneka nohutoti'a Yesu Kilisitohi lili'na bona'a nohu'ibe. Lenali hepatoga bona'i Yesu Kilisitohi keheli emite mine'ahana bona'ise. Nehafihe? To Hu'mamofihi yagapana'i lolo hi'ahana bona'i to mono kaba bona'i to babafi bona'i lenalise. Nani fayahi ya'ma koyo nolepube.

Philippians 1

1 Nani Poluita to Timoti hiti moneka nohutoti'a Yesu Kilisitohi lili'na bona'a nohu'ibe. Lenali hepatoga bona'i Yesu Kilisitohi keheli emite mine'ahana bona'ise. Nehafihe? To Hu'mamofihi yagapana'i lolo hi'ahana bona'i to mono kaba bona'i to babafi bona'i lenalise. Nani fayahi ya'ma koyo nolepube. 2 Afotifu, Hu'ma to Sipi Boti Yesu Kilisito aitogati lenehe'mose'na'a to fuluna'a lenalitoga minomo tito minalibe.

Filipai bona'magi kumu Hu'mamofitoga nolina ka

3 Nani lenali kumu kehe lelito nobuto Hu'mamofihi fokehi holata nohube. 4 Lenali ka lamana'a yata'a hapi fite kehelilete ana'asi nani ana kaga lili'nalo nehe'mete minete hi'ahana ya'mu kehelugo lenali kumu yabe luto komopa'nigu bati higo minoto Sipi Bomofitoga fokehi luba luba huto nominobe. 6 To ya'ma luto ma luto keheli sepa ito keheli'ohube: Foya lamana'a lenalitoga hapi fi'ehina bo Hu'mau lelito buto li baga neinogo Yesu Kilisitou henetilina kana'a li etalube'mu hibe. 7 Lenali komopa'nigu mine'ahanamo ni'inagihe. Nani lenali asaga'i ma luto keheli lepilata hu'ohunamo bati nohibe. Nani maga naga nonugu nohugo to ka lamana'amu yabe luto ka foya lito li hetofa huto nolugo lenali hiti nani hiti moneko nohuto Hu'mamofihi lehe'mose'na'a guna moloto lito minolata nohune. 8 Yesu Kilisito nani komopa'a limilata nohina yamofihi kehelito nani lenali kumu yabe luto keke'i lu lepoloto kehelilata nohube. Hu'mau keheli'ehigo lama'naka nolube.

9 To komopatini emilatana hofa toto to kehelise'natinimu to kehelise'nauba napa huto tilibe luto Hu'mamofitoga luto moloto nohube. 10 To lenali ya hiletetini kaga hapa'a kehelite i be ligi'ehinana kehelilete to Yesu Kilisito nehetilina kanagu komopatini kolota mehuse gulu gulu linogo mone ka lepekilina'a meni'ibe. 11 To ana kanagu Yesu Kilisitou lenehe'menogo komopatini bati bati hite minelenogo bona'magi bu lenegete yege nofune lite Hu'mamofihi fokeha'a lilana'mu yabe.

Nani Yesuhi foya'a li etoto nominobe

12 Nalalu'nigita, nani kumu keheli'ahana ka lu hokolo hu nolepube. Nanitoga nasana keta'a hiti huto hu'ehina yanauba ka lamana'a fi hetofa hiligopa ka lamana'auba bu baga ito buto lilibe luto huto hu'ehina. 13 Nani Kilisito kumu yabe luto naga nonugu nohube. Yamofihi kaga'auba maga'ma gihiti bo sipi bomofihi gimi bona'i hiti to bona'i luga'a hiti enali enegekesalo bu baga i'ehibe. 14 To naga nonugu nohuna'mu yabe lite magati'ma ligibo lagabo luga'amagi enali Sipi Bomofi kumu kehelilete keta mehuse hite Hu'mamofihi kaga'amu enelesa meligo lu huto hilata nehabe.

15 Luga'amagi Kilisitohi ka'amu kenasabo bibe ilubu alubu nehabe. To luga'amagi enali komopa'ani lamana higo kehelite ai ka'a kehelite lilata nehabe. 16 Enali yamofihi kehelilete komopa'ani nimite Hu'mau maga minoto ka lamana fi hetofa hilane luto luloto nele'mo molo'ehinamo ni'ibe lite kehelilata nehanamo ni'ibe. 17 To luga'amagi faga hiti pebisa hete bite enali'ani enigi'ani lelite netite Kilisitohi gi'a helata nehana yamagi enali naga nonugu nominona yamofihi gupisalo keke'i luse foya nimilune'mu ya hilata nehabe.

18 To ya suhi ma suhi huto mono ka ya'ma faga hiti komopatiguti lilina ka hiti melilune, lamana kasigo li melete lilana yamofihi luba sabo mehilune. Fa'mene Kilisitohi kaga'auba ifu tili hilube'mu hibe. Yamofihi lamana'a huto nohigo komopa'nigu bati nohibe. 19 To lenali nani kumu yabe lite kehelite Hu'mamofitoga lilata hi'ahana foya lilenogo to Yesu Kilisitohi Sikalafu'auba nele'mo bati hulenogo bati huto minaluna nasana li huto molo netalube'mu hibe. Komopa'nigu ya'ma luto kehelito keheli bati huto minalube'mu hube. 20 To minoba minoba'namufi to fililatanamufi komopa'ni keta mehuse honogo nugufa komopa'ni hiti Kilisitohi keheli eminogo'ni yanauba ule'alena'a lolo hu netalibe luto buto mino'ohunamo ni'ibe. To ya holito buto minalube luto nubuya hulatana li huto mehuse keheli lamana huloto Yesu Kilisitohi gi'a liyafa huto minalube'mu hube. 21 Kilisito ai mino hepito minoto ho tito hiluna nasana'ni lolo nohibe. To filise'na yanauba tito mino'ehina nasana li huto huto molo netalibe. 22 To metoga molo emito minaluna yanauba foyamofihi lamana'a aku li huto hilibe. Yamofihi henana'mu keta mehuse hilube luto negekesagu loe lae hu'ehibe. 23 To loe lae nasana'mu ni'igo hena'ni hilube? Nani mone'namufi mone'namu laga nebesilata nohibe. Metogati Kilisitou nele'mo hulenogo ai hiti minose'na hiluna laga'ni nebesilago yanauba ya'ma nasana tito ni'ibe. 24 Lenehe'mose'namu minalube luto to lenali megusa'a mine lalabe luto ya'ma lenali kumu yabe luto metoga aku'i yamofihi emito minenogo'ni bati hilibe. 25 To yamofihi ya'ma keheli sipi tuto keheli'ohunamo ni'inaya nani mefilise lenali hiti minoto lenele'mo bati hinogo lenali keheli bati huse'natini to komopatini haya noinamofihuba napa huto mino lito bilibe. 26 To ya hulenogo lenalitoga aku'i buto minenogo lenali Polu kumu yabe lite Yesu Kilisitohi fokehi li ete'ahanamagita aku'i molo emito fokehi mone hiti li etalabe.

27 Moneko'i lenali Kilisitohi ka lamana'a mege'i melete hetofa suhi lite minenogo hepite komopatini moneko hinogo hetofa kagamofihi foya'a amuya amuya melete nelinogo nani lenalitoga bu nehetilufi mebilufi lenali kumu bati ka nelinogo kehelilube. 28 Fatehe bona kumu lenelesa melise amuya melete ka lamana'a lu yege hilo. Ya hite minete, Hu'mau fatehe bona'magihi enele'mo laba hilibe luto to ana huto lenubuto bito lenelepilibe luto lenali mukima'i nolatanamofihi hapa'a li huto hilune'mu habe. To Hu'mau ai lenubuto bilinamofihi hapa'a li huto hilune'mu habe. 29 Lenali ai kumu foya'a lilata nehanaya, Yesu Kilisitou lenele'mo'ehina hapa'a henana ni'ibe? Lenali Kilisitohi agoya hi etalabe luto to lenemehi emilabe lutofiye? O'yo. To moneko'i ai kumu yabe lite keke boke nasanamofihi gupisalo minalabe luto yabe. 30 To nani mono kumu yabe luto lubagu suhi huto amuya moloto foya koyapa'i nolugo bu nege'ahanamo ni'ibe. To yatai ya'ma ka'ni kehelilata nehabe. To mono kumu yabe lite ana lubagu amuya melete foya lenali hiti anago hite yamofihi lilata hi'ahanamo ni'ibe.